მუსიკის ფესტივალის ტერიტორიაზე 260 გვამია ნაპოვნი – ისრაელის სამძებრო-სამაშველო სერვისი
ისრაელის სამძებრო-სამაშველო სერვისის, ZAKA-ს ინფორმაციით, მუსიკის ფესტივალის ადგილას, სადაც ტერორისტები მშვიდობიან მოსახლეობას დაესხნენ თავს, 260 გვამია ნაპოვნი.
7 ოქტომბერს ნეგევის უდაბნოში, კიბუც რე-იმთან ახლოს, ებრაული დღესასწაულის სუკოტის აღსანიშნავად ნოვას მუსიკალური ფესტივალი იმართებოდა. მუსიკის მოყვარულები კვირების განმავლობაში ელოდნენ ფესტივალს.
საცეკვაო ფესტივალი მთელ ღამეს გაგრძელდა, თუმცა გამთენიისას, ადგილობრივი დროით 06:30 საათზე, სირენების ხმა გაისმა, რასაც ძალიან სწრაფად რაკეტების სროლაც მოჰყვა.
ამჟამინდელი მონაცემებით, ჯამში, ისრაელის ტერიტორიაზე დაღუპულთა რიცხვმა 600-ს გადააჭარბა. ცხედრები სასაზღვრო ტერიტორიაზე მომუშავე ძალებმა იპოვეს.
ოჯახები უგზო-უკვლოდ დაკარგულ ახლობლებს ეძებენ. ჯამში, დაჭრილია 2048, ხოლო, მძევლად აყვანილია ათობით ადამიანი.
